أفضل طريقة لشراء المكملات الغذائية

مكملات غذائية
أفضل طريقة لشراء المكملات الغذائية

أيه أفضل طريقة لشراء المكملات الغذائية وخاصة إنها بقت من أكتر المنتجات الموجودة في السوق
وده خلى شراء المكملات الغذائية المضمونة عملية صعبة شوية ومحتاجة ترتيب، خصوصاً إن الأنواع بقت كتيرة جداً
ومتنوعة منها مكملات فيتامينات ومعادن وأعشاب وأحماض أمينية ومكملات عبارة عن كوكتيل من المكونات. 

الكوتش جاي يعرفك النهاردة إزاي تشتري مكمل غذائي سليم ومناسب ليك وإيه هي أفضل طريقة لشراء المكملات الغذائية
وإيه اللي تعمله قبل شراء المكملات الغذائية. 

أسعار المكملات الغذائية في مصر

أول خطوة هي أهم خطوة ولازم ناخد بالنا منها كويس وهي: 

1- اسأل الدكتور إذا كان المكمل يناسبك ولا لا؟ 

روح للدكتور بتاعك وخد بنصيحته الطبية وشوف إذا كان المكمل ده هيفيدك ولا لأ؟ ساعتها الدكتور هيعملك فحص لجسمك
وهياخد منك عينة دم وهيشوف إذا كان في أي نقص في الفيتامينات أو لو عندك أي مشاكل تانية ممكن تحتاج مكملات. 

وفي الحالة دي الدكتور هيعرف المناسب ليك وهيرشحلك إيه نوع المكمل اللي يناسبك بس لازم تقول للدكتور إنت ليه محتاج تاخد المكمل وتقوله إذا كنت عاوز نوع معين من المكملات علشان حاسس إنه هيعوض عندك نقص معين وتسأله هل المكمل هيحسن صحتك بشكل عام ولا مش هيأثر.

 يعني لازم تشارك الدكتور كل الأسباب المتعلقة باستخدامك للمكمل علشان تقدر توصل لأفضل طريقة لشراء المكملات الغذائية.

2- اسأل الصيدلي هل مكونات المكمل ده بتتعارض مع الأدوية بتاعتك؟

دي نقطة مهمة جداً لازم ناخد بالنا منها وهي إن في بعض الأدوية أو الأعشاب بتتعارض مع بعض عناصر المكملات
علشان كدا لازم تعرف الصيدلي إيه المكمل اللي انت عاوز تشتريه وإيه نوع الأدوية اللي بتاخدها علشان
يقولك إذا كان المكمل هيبقى آمن ولا هيتعارض مع الأدوية بتاعتك.

3- ابحث كويس عن المكمل علشان تعرف كل فوائده وأضراره

لازم بعد ما تسأل كذا طرف تبدأ تدور بنفسك عن المكمل اللي عاوز تشتريه علشان تشوف أراء وتعليقات الناس اللي جربته قبل كدا
إيه لكن متاخدش بأي نصيحة عشوائية على الإنترنت أو تاخد بنصيحة تعليق في أي بوست. 

الفكرة هي إنك بس تشوف أراء الناس وتبحث عن الدراسات العلمية الخاصة بالمكمل ده وتشوف نتائجها إيه وإيه فوائده وإيه أضراره.

جرّب المواقع دي هتفيدك في البحث بتاعك، 

 

4- في ناس معينة مينفعش تاخد مكملات

في ناس معينة مينفعش ياخدوا المكملات لأنه ممكن يكون ضار عليهم ويعرض صحتهم للخطر والناس دي على حسب وصف الأطباء هم: 

  • الحامل
  • الناس اللي بتتعالج من القلب 
  • الناس اللي محتاجة تعمل عمليات من أي نوع 
  • مريض السرطان

5- اقرأ العلامة كويس

بعد ما تحدد وتقرر إيه هو المكمل المناسب ليك الخطوة التانية بقى علشان تشتري أفضل مكمل هي إنك تقرأ العلامة اللي عليه كويس
وتتأكد إنه موجود عليها أبسط وأهم المعلومات زي المكونات وتعليمات الجرعة وبيانات الشركة المُصنعة. 

لو ملقتش البيانات دي على العلبة يبقى لازم تاخد بالك كويس إن المنتج ده كدا أي كلام ويستحسن إنك تبعد عنه
لأن دي من أبسط الحاجات اللي لازم تكون موجودة على المنتج. 

6- اتأكد إن المنتج أمريكي الصنع Made in USA

اتأكد إن المنتج مصنوع في أمريكا أو مصنوع في شركة أمريكية عموماً علشان تطمن إن المكونات مظبوطة وصحية وياريت تتجنب أي منتج ميكونش صناعة أمريكية.

7- احذر من الإدعاءات المغرية

يعني ابعد عن أي مكمل مكتوب عليه إنه قادر على علاج أو منع أو شفاء مرض معين،
المفروض إن المكملات ميكونش على العلبة بتاعتها أي إدعاءات من النوع ده علشان كدا لازم تكون حريص جداً لو شفت الكلام ده. 

يعني متتخدعش بأي كلمات زي طبيعي “natural” أو معتمد “certified” أو standardized أو verified. المصطلحات دي مش ضروري تكون صحيحة وبتأثر على أمان المنتج وجودته وخصوصاً لما ميكونش المنتج عليه ملصق USP.

8- اختار مكمل ميكونش فيه عناصر موجودة بنسب أكتر من الطبيعية

ساعات زيادة بعض العناصر بيكون ضار على الجسم والصحة بشكل عام زي بعض الفيتامينات علشان كدا لما تلاقي نسب الفيتامينات موجودة بنسب عالية عن الطبيعي يبقى تبعد عن المنتج ده إلا بقى لو الدكتور هو اللي نصحك بالمكمل ده. 

ملحوظة:
فيتامين A وD وE وK موجودين في الجسم بصورة طبيعية لكن لو زادوا عن النسب الطبيعي ممكن يعملوا تسمم داخل الجسم. 

9- اختار مكمل يكون سهل الاستهلاك 

في منتجات بتبقى عبارة عن سوائل أو مساحيق أو كبسولات، لو مش بتحب بلع الكبسولات
يبقى دور على السوائل أو الباودر علشان يبقى سهل عليك تخلطه مع المأكولات والمشروبات. 

10- قارن الأسعار

مش دايماً السعر بيحدد الجودة أو ضمان المنتج لكنه فكرة كويسة مينفعش ننساها وهي إننا نقارن بين أسعار المكملات
قبل ما نقرر هنشتري إيه وكمان نقارن بين الشركات المصنعة أو البرندات بتاعة المنتج علشان نوصل لأفضل منتج. 

يعني مثلاً المكملات اللي بتكون مصنوعة في أمريكا وعليها علامة USP هي هتكون أفضل المنتجات وممكن كمان تكون أغلى من المنتجات اللي مش عليها نفس العلامة.

11- راجع تاريخ إنتهاء الصلاحية

تاريخ انتهاء الصلاحية مهم جداً على علب المكملات لأن في بعض المكونات بتفقد تأثيرها مع الوقت علشان كدا لازم تخلي بالك من التاريخ على أي مكمل تشتريه وطبعاً مش محتاج أقولك متشتريش أي منتج منتهي الصلاحية. 

12- اشتري المكمل بتاعك من مكان موثوق

لما تشتري المكمل بتاعك من محل مكملات أو صيدلية أو شركات كبيرة وموثوقة وليها اسمها ده بيكون أحسن ليك
من إنك تشتري من على النت مثلاً لأنك هتبقى متأكد من صلاحية تخزين المنتج وهتقدر تقارن الأسعار بسهولة
لما يكون المنتج قدام عينك لأن المنتجات اللي موجودة على النت ممكن تخدعك بالصور وكمان
مش هتقدر تتأكد من المكونات اللي على المنتج لأنها ممكن تكون حاجات مش حقيقية. 

طيب دلوقتي لما عرفنا كويس إزاي نتأكد إذا كان المكمل مناسب لينا ولا لأ وعرفنا إزاي نشتري مكمل موثوق وعرفنا إيه أفضل طريقة لشراء المكملات، خلينا دلوقت نعرف إزاي نستخدم المكمل ده بطريقة صحيحة. 

1- اتبع تعليمات الجرعة المكتوبة على المنتج أو استشير الدكتور. 

امشي على الجرعة الموجودة على المنتج أو زي ما الدكتور ينصحك ومتقولش لنفسك إنك لو زودت الجرعة هتزود الاستفادة،
المعلومة دي غلط جداً متاخدش غير الجرعة المناسبة ليك علشان متتعرضش لأي أثاء جانبية. 

ولازم تعرف امتى تاخد المكمل، يعني مثلاً هل أخده على معدة فاضية ولا مع الأكل؟ هل بالليل ولا الصبح؟
لازم تفهم النقاط دي كويس علشان تاخد المكمل صح. 

2- وقف المكملات لو حسيت بأي أعراض جانبية

لو لاحظت أي أعرض جانبية غربية بعد تناول المكلات وقفها على طول وارجع للدكتور واسأله عن الحالة دي
واتأكد إذا كانت بسبب المكمل ولا لأ علشان تفضل في الأمان. 

علشان لعبتنا بتعتمد على الصحة واللياقة البدنية، الكوتش النهاردة عرفّك على أفضل طريقة لشراء المكملات الغذائية
وتعمل إيه قبل وبعد شرائها علشان صحتك ولياقتك هي رقم واحد يا بطل… 

نزل أبلكيشن الكوتش دلوقتي واعرف أيه أنسب المكملات الغذائية ليك، بالإضافة إلى برامج التمرين المخصصة عشانك وحسب مستواك.


المصدر: 

https://bit.ly/2Jzmzbu