أضرار السكر الدايت وبدائله

تغذية صحية
أضرار السكر الدايت

تقديم الطعم الحلو من غير أي سعرات حرارية، طريقة سهلة لفقدان الوزن بشكل فعال. علبة الصودا المحلاة بالسكر
فيها حوالي 150 سعر حراري كلها تقريبا من السكر، نفس كمية علبة الصودا الدايت فيها صفر سعر حراري!
تحس إن الموضوع مش منطقي، علشان كده هنتكلم هنا عن أضرار السكر الدايت .

أعلنت جمعية القلب الأمريكية (AHA) وجمعية السكري الأمريكية (ADA) التحذير من استخدام السكر الدايت
بدل السكر لمكافحة السمنة أو مشاكل التمثيل الغذائي أو مرض السكري.
الاستخدام الذكي للمحليات الصناعية أو السكر الدايت ممكن يساعدك على تقليل السكريات المضافة
في نظامك الغذائي، وبالتالي تقليل السعرات الحرارية اللي بتحصل عليها، فيساعدك توصل لوزن صحي
وتحافظ عليه، بالتالي يقلل من خطر الإصابة بأمراض القلب والسكري.

اعرف من هنا.. يعني إيه سكر دايت ؟ أنواعه وفوايده وأضراره

لكن مش كل المحليات الصناعية زي بعضها، وافقت إدارة الأغذية والعقاقير (FDA) على خمسة مواد تحلية صناعية:
السكرين ، الأسيسولفام ، الأسبارتام ، النيوتيم ، والسكروز. ووافقت على محلي طبيعي واحد منخفض السعرات الحرارية،
وهو ستيفيا. كيفية استجابة جسم الإنسان والدماغ للمحليات دي معقد جدا.

أضرار السكر الدايت

من ضمن المخاوف من استخدام السكر الدايت، إن الواحد لما يلاقي نفسه وفر سعرات حرارية فيه،
فياخد السعرات الحرارية دي في حاجة تانية، يعني مثلا يقول “أنا شربت بيبسي دايت مفيهوش أي سعرات،
فهاخد حتة كيكة” انت كده بتخدع نفسكّ.

من أضرار السكر الدايت إنه بيغير الطريقة اللي بتتذوق بيها باقي الأكل والمشروبات، لأن المحليات الصناعية
أكثر فعالية من السكر العادي، فكمية صغيرة منها بتديك طعم حلو زي طعم كمية أكبر من السكر،
من غير إضافة سعرات حرارية زيها. فالإفراط في تحفيز مستقبلات السكر من الاستخدام المتكرر للمحليات
شديدة الكثافة دي ممكن يقلل من تذوقك للحاجات التانية، بالتالي الحاجات الأقل في السكر زي الخضار والفاكهة،
هتبدأ تبقى مش مستساغة بالنسبالك.

بمعنى إن من أضرار السكر الدايت إنك هتبدأ تتجنب الأطعمية الصحية والمغذية، مع زيادة استهلاكك من الأطعمة
اللي فيها نكهة صناعية. أشارت الأبحاث إن المحليات الصناعية كمان ممكن تمنعك من ربط الحلاوة
مع السعرات الحرارية، ونتيجة لده هتلاقي نفسك بتميل لأكل المزيد من الحلويات، وبتميل لاختيار
الأطعمة الحلوة على حساب الأطعمة المغذية، فوزنك يزيد.

هتقول ما أنا أقدر أوقف المشروبات اللي فيها محليات صناعية دي وقت ما أحب، لا للأسف، لأن الأبحاث
اللي أجريت على الحيوانات أشارت إلى إن المحليات الصناعية ممكن تسبب الإدمان، في الدراسات
اللي أجريت على الفئران تعرضت للكوكايين، وبعدين ادوها الاختيار بين الكوكايين الوريدي أو السكرين الفموي،
معظمهم اختار السكرين!

ازاي بيقولوا إن المحليات الصناعية آمنة؟

الموضوع هنا مرتبط بتعريف الأمان نفسه، فالدراسات اللي أدت لموافقة إدارة الأغذية والعقاقير (FDA) على الأمان
بالنسبة للمحليات الصناعية دي، استبعدت خطر الإصابة بالسرطان جراء استخدامها. ورغم كده الدراسات دي
اتعملت باستخدام كميات أقل بكتير من كمية الصودا الدايت اللي الناس بيستهلكوها حاليا يوميا. فعلا محدش
يعرف تأثير الكميات الكبيرة من المواد الكيميائية دي على مدار السنين.

كمان من أضرار السكر الدايت، بعيدا عن السرطان، في دراسة، ارتبط الاستهلاك اليومي من مشروبات الدايت
بزيادة خطر الإصابة بمتلازمة التمثيل الغذائي بنسبة 36%، وزيادة خطر الإصابة بالنوع التاني من السكري بنسبة 67%..
مش هي دي الأمراض اللي المفروض المحليات الصناعية بتساعد على الوقاية منها أصلا؟

بدائله

نعمل إيه؟ نرجع للسكر العادي؟ لأ، لكن مثلا الأطعمة المحتوبة على السكر في شكلها الطبيعي، زي الفواكه الكاملة مثلا، بتكون مغذية بشكل أفضل، لأنها غنية بالألياف، ومبتعليش السكر في الدم بشكل كبير، من ناحية تانية،
فالسكر المكرر والمركز المستهلك بكميات كبيرة بيزود بسرعة من مستويات الجلوكوز والأنسولين في الدم،
وبيزود من الدهون الثلاثية.

أفضل حاجة دايما الالتزام بالخضار والفاكهة الطبيعيين ضمن نظام غذائي صحي متكامل، يوفرلك احتياج جسمك
من كل العناصر الغذائية المهمة والأساسية، واللي موجود في البرامج الغذائية على أبليكشن الكوتش،
حمله دلوقتي من هنا عشان تاخد نظام غذائي مناسب لوزنك وهدفك ومستوى نشاطك، ومعاه برنامج تمارين
رياضية مناسب للياقتك ولظروفك سواء هتقدر تنزل تتمرن في جيم أو هتتمرن في البيت.

 

المصدر: http://bit.ly/2oAIXdN